डेटूडे खबर डेस्क
  ०५ चैत्र २०८०

                            
रौतहट । रौतहटको ईशनाथ नगरपालिकाका तत्कालीन प्रमुख प्रशासकीय अधिकृत किशोर गुप्तासहित तीन जनाविरुद्ध भ्रष्टाचारको मुद्दा दायर भएको छ ।
ईशनाथ–५ को श्री आधारभूत विद्यालयको दुई कोठे पक्की भवन निर्माण गर्दा मापदण्ड, गुणस्तर र मूल्याङ्कन विपरीतको काम गरेको भन्दै अख्तियार दुरुपयोग अनुसन्धान आयोगले आज गुप्तासहित नगरपालिकाका तत्कालीन इन्जिनियर सत्यपाल सौरभ र विद्यालयका तत्कालीन प्रधानाध्यापक मुहमद समिम अख्तरविरुद्ध विशेष अदालतमा भ्रष्टाचारको मुद्दा दायर गरेको हो ।
तत्कालीन इन्जिनियर सौरभले कार्यसम्पादन प्रतिवेदनमा सम्झौताको दरभन्दा बढी कायम गरी ८६ हजार छ सय ४७ रुपैयाँ भ्रष्टाचार गरेको अख्तियारको ठहर छ । यसैगरी अन्तिम भुक्तानीका लागि प्राविधिकबाट तयार गरिएको नापी किताब र कार्य सम्पन्न प्रतिवेदनमा १४ लाख ३५ हजार नौ सय खर्च भएको देखिए पनि तत्कालीन प्रमुख प्रशासकीय अधिकृत गुप्ताले दुई लाख ३५ हजार आठ सय ९५ रुपैयाँ बढी भुक्तानी गरेको अख्तियारले जनाएको छ । आयोगकाअनुसार तत्कालीन प्रधानाध्यापक अख्तरले १३ लाख ५३ हजार ५० खर्च देखाउनुपर्नेमा १६ लाख ५३ हजार ५० रुपैयाँ खर्च लेखेका थिए ।
अख्तियारले इन्जिनियर सौरभसँग ८६ हजार छ सय ४७ रुपैयाँ, प्रमुख प्रशासकीय अधिकृत गुप्तासँग दुई लाख ३५ हजार आठ सय ९५ र प्रधानाध्यापक अख्तरसँग तीन लाख तीन हजार सात सय ९७ रुपैयाँ बिगो माग गरेको छ ।