एसईई नतिजाप्रति सांसदहरू असन्तुष्ट, ‘विद्यार्थी हाेइन सरकार फेल भएकाे हाे’
![](./uploads/day2daykhabar/post/2024/Samsadma-samdad-nidaudai_1719587206.jpg)
डेटूडे खबर डेस्क
१५ आषाढ़ २०८१
काठमाण्डाैँ । प्रतिनिधि सभाका सांसदहरूले माध्यमिक शिक्षा परीक्षा (एसईई) मा ५२ प्रतिशतभन्दा धेरै विद्यार्थी फेल भएको विषयमा गहन अध्ययन गर्नुपर्ने बताएका छन् ।
प्रतिनिधि सभाकाे आजकाे बैठकको विशेष समयमा बोल्दै सांसदहरूले एसईईको नतिजाप्रति असन्तुष्टि व्यक्त गरेका हुन् । सांसदहरूले धेरै विद्यार्थी अनुत्तीर्ण (फेल) हुनुमा सरकारकै दोष रहेको बताएका छन् ।
बैठकमा बोल्दै राष्ट्रिय प्रजातन्त्र पार्टी (रास्वपा) की सांसद रोशन कार्कीले नेपालको शिक्षा प्रणाली र सरकार नै असफल भएको टिप्पणी गरे । उनले यसप्रति शिक्षा मन्त्रालयलाई गम्भीर हुन आग्रह गरे ।
उनले भने, ‘हिजो प्रकाशित एसईईको परिणामले हाम्रो अगाडि ठूलो प्रश्न चिह्न खडा गरेको छ । ५२ प्रतिशत असफल हुनु भनेको यो राष्ट्र नै असफल हुनु हो । शिक्षा प्रणाली नै असफल हुनु हो । सरकार असफल हुनु हो । शिक्षामन्त्रीको ध्यानाकर्षण गराउँछु । ५२ प्रतिशत विद्यार्थीको मनस्थिति कस्तो भयाे होला ? यसमा शिक्षा मन्त्रालय गम्भीर हुनुपर्छ, यसको बारेमा अध्ययन गर्नुपर्छ । विद्यालयको कमजोरी हो कि ? शिक्षा नीतिको कमजोरी हो कि ? विद्यार्थीहरू आफैँको कमजोरी हो कि ? अध्ययन गरेर जरो पत्ता लगाऔँ ।’
त्यस्तै नेपाली कांग्रेसका सांसद प्रदीप पौडेलले विद्यार्थी अनुत्तीर्ण भएका हुन् कि सरकार अनुत्तीर्ण भएको हो भनी प्रश्न गरे । उनले शिक्षामा गुणस्तरीयता नभएका कारण यस प्रकारको परिणाम आएको बताए ।
उनले भने, ‘विद्यार्थी फेल भएका हुन् कि सरकार फेल भएको हो ? सरकारका असफलताका कारणले विद्यार्थीहरूलाई अयोग्य ठहराइयो । सरकारले गुणस्तरीयता वृद्धि गरेर धेरै विद्यार्थीहरूलाई पास गर्न लाग्नुपर्थ्याे । ५२ प्रतिशत विद्यार्थी फेल भएका हुन् कि सरकार फेल भएको हो ? सरकारले २ लाख ४२ हजार ३ सय १३ जना विद्यार्थीलाई तिमी अयोग्य हौ, तिमी पढेर खान सक्दैनौ, उच्च शिक्षा पढ्ने तिम्रो हैसियत छैन भनेर घोषणा गर्न मिल्छ ? सरकारले नागरिकलाई त्यसरी अयोग्य घोषणा गर्न सक्छ ? शिक्षामा गुणस्तरियता नभएकोले यस्तो भएको हो ।’
बैठकमा सांसदहरूले गणित, विज्ञान र अङ्ग्रेजी विषयका शिक्षकको विशेष व्यवस्था गर्न पनि सरकारसँग माग गरेका छन् । हिजो प्रकाशित एसईईको नतिजाअनुसार परीक्षा दिएकामध्ये गणितमा ३८ प्रतिशत, विज्ञानका २७ प्रतिशत र अङ्ग्रेजीमा २१ प्रतिशत विद्यार्थी 'ननग्रेड' मा परेका छन् ।
यस्तै जनता समाजवादी पार्टी (जसपा) नेपालकी सांसद रेखा यादवले विद्यार्थीहरू अनुत्तीर्ण हुनुको कारणबारे अध्ययन गर्नुपर्ने धारणा राखिन् ।उनले ५० वर्षे पुरानो शिक्षा नीतिको ढर्रा कहिले तोड्ने भनी प्रश्न गररिन् ।