डेटूडे खबर समाचारदाता
  २५ वैशाख २०७९

                            
काठमाण्डाै –सर्लाहीमा मिठाई खाएपछि नेकपा माओवादी केन्द्रबाट उम्मेदवार बनेकाहरु विरामी परेका छन् ।
हरिवन नगरपालिका वडा नम्बर ११ मा वडाध्यक्ष र सदस्य पदमा उम्मेदवारी दिएका उम्मेदवारहरू मिठाई खाएपछि बिरामी परेपछि उपचारका लागि वीरगञ्ज पठाइएको छ ।
माओवादीबाट वडाध्यक्ष उम्मेदवार शेख इस्तिहारसहित दुई वडा सदस्यका उम्मेदवार बिरामी परेको प्रहरीले जनाएको छ।
यस सम्बन्धमा थप अनुसन्धान भइरहेको सर्लाही प्रहरीले जनाएको छ ।
यसैबीच
चुनावको समयमा प्रसाद वा सगुन भन्दै शरीरलाई हानी पुर्‍याउने खानेकुरा खुवाउने गरेको पाइएको भन्दै सचेत रहन प्रहरीले आग्रह गरेको छ ।
प्रहरी प्रधान कार्यालयले आज आइतवार सार्वजनिक सूचना निकालेर राजनीतिक दलका नेता, उम्मेदवार र कार्यकर्ताहरू प्रचारप्रसारका क्रममा घरदैलो कार्यक्रम गरिरहेको अवस्थामा नचिनेका मानिसले सगुन वा प्रसाद भन्दै खुवाएका अखाद्य बस्तुले बेहोस हुने र चक्कर लाग्ने लगायतका घटना भएको भन्दै सतर्कता अपनाउन आग्रह गरेको हो । यस्ता प्रकारका घटनाबाट सुरक्षित रहनका साथै कतै यस्तो घटना भएमा तत्काल प्रहरीलाई खबर गर्न सूचनामा भनिएको छ ।