डेटूडे खबर डेस्क
  २४ आषाढ़ २०७९

                            
एजेन्सी
गोली प्रहारबाट गम्भीर घाइते हुनुभएका जापानका पूर्व प्रधानमन्त्री सिन्जो आबेको विश्वभरबाट स्वास्थ्य लाभको कामना भएको छ ।
नारा सहरमा भएको एक चुनावी कार्यक्रममा भाषण दिइरहेको अवस्थामा पूर्व प्रधानमन्त्री आबेमाथि गोली प्रहार भएको थियो । गोली लागेर ढलेका आबेलाई सुरक्षाकर्मीले तत्कालै खुला ठाउँमा लगेका थिए । केहीबेरपछि  एअर एम्बुलेन्सबाट अस्पताल लगिएको र उहाँको होस् आउन नसकेको समाचारमा उल्लेख छ ।
विश्वभरका नेताहरुले आबेको स्वास्थ्य लाभको कामना गरेका छन् । जी-२० सम्मेलनको क्रममा इन्डोनेसियामा रहेका अमेरिकी विदेशमन्त्री एन्टोनी ब्लिङ्कनले घटनाको निन्दा गर्दै आबेको स्वास्थ्य लाभको कामना गर्नुभएको छ ।
प्रहरीले गोली प्रहार गर्ने ४१ वर्षका एक पुरुषलाई पक्राउ गरेको छ । जापानमा गोली प्रहारका घटना निकै कम हुने गरेको अवस्थामा पूर्व प्रधानमन्त्रीमाथि नै आक्रमण हुनुलाई निकै गम्भीरताका साथ लिइएको जापानी सञ्चारमाध्यमले जनाएका छन् । जापानमा हाते बन्दुक र पेस्तोलमाथि प्रतिबन्ध छ ।
६७ वर्षका सिन्जाे आबे जापानमा सबैभन्दा लामो समय प्रधानमन्त्री बन्ने नेता हुनुहुन्छ । सन् २००६ देखि २००७ सम्म र सन् २०१२ देखि २०२० गरी ९ वर्षभन्दा लामो समय उहाँ जापानको प्रधानमन्त्री बन्नुभएको छ । सन् २०२० मा स्वास्थ्यमा समस्या देखिएपछि उहाँले पद छाड्नुभएको थियो । युद्धपछिको जापानलाई समृद्ध बनाउन र सुनामीले ध्वस्त बनाएका संरचना पुनर्निर्माण गर्न उहाँको ठूलो भूमिका रहेको छ ।