डेटूडे खबर डेस्क
  १९ चैत्र २०८१

                            
वीरगञ्ज । वीरगञ्जको विर्तास्थित बाल सुधारगृहका बालकहरूले आज मंगलबार दिउँसो नाराबाजी गरेका छन् ।सेवा सुविधाको माग राखेर बाल सुधारगृहभित्रका बालकहरूले नाराबाजी गरेका हुन् ।
बाल सुधारगृहले सामान्य आधारभूत आवश्कयताहरू समेत उपलब्ध नगराएपछि विरोधस्वरूप बाल सुधारगृहका बालकहरूले  नाराबाजी गरेको पाइएको पर्साका एसपी गौतम मिश्रले  जानकारी दिए ।
‘गर्मी अत्यधिक बढेकाे छ, पंखा छैन, पिउनेपानीको सुविधा राम्रो भएन । बत्तीका लागि वैकल्पिक व्यस्था गर्नुपर्‍यो लगायत माग राखेर बालकहरूले होहल्ला गरेका रहेछन् । यसबारे जानकारी पाउने वित्तिकै प्रमुख जिल्ला अधिकारी गणेश अर्यालसहित हामी सुधार गृह पुग्यौं,’ मिश्रले भने ।
असन्तुष्ट बालकहरूको माग सम्बोधन गर्ने विषयमा बाल सुधारगृह प्रशासनसँग छलफलपछि अवस्था सामान्य बनेको मिश्रले बताए ।
बाल सुधारगृह प्रशासनले बालकहरूको सामान्य आधारभूत आवश्यकताहरू पूरा गर्दै जाने र अन्य मागहरू पूरा गर्नका लागि आवश्यक बजेट प्रबन्धका लागि विभिन्न सरोकार पक्षसँग समन्वय गर्ने सहमति भएको उनले बताए ।