डेटूडे खबर डेस्क
  १६ जेठ २०८२

                            


जनकपुरधाम । पित्त थैलीको शल्यक्रियापछि चार महिनादेखि बेहोस रहँदै आएकी सर्लाहीको हरिपुर्वा नगरपालिका–५ की २५ वर्षीया पविता यादवको आज मृत्यु भएको छ ।
उनी काठमाडौंको केएमसी अस्पतालको भेन्टिलेटरमा झण्डै साढे तीन महिनादेखि उपचाररत थिइन् । आज बिहान ७ बजे अस्पतालमै उनको मृत्यु भएको गौशाला प्रहरी वृत्तका हवल्दार वेदनाथ पौडेलले जानकारी दिए ।
पविताका पति अंगेश यादवलाई आज बिहान नै अस्पतालबाट फोन गरी जानकारी दिइएको थियो । आर्थिक अवस्था कमजोर भएका अंगेश केही समययता अस्पतालमै कुरुवा बस्नसमेत सकेका थिएनन् । खर्चको जोहो नहुँदा उनी गाउँ फर्किन बाध्य भएका थिए । अस्पताल र फार्मेसीबाट पटकपटक तिर्न बाँकी बिलको दबाब आउन थालेपछि उनी काठमाडौंबाट फर्किएका थिए ।
कुरुवा नभएपछि अस्पतालले अंगेशलाई बारम्बार फोन गरेर बोलाउने प्रयास गरेको थियो । अन्ततः जेठ १४ गते केएमसी अस्पतालले जिल्ला प्रहरी कार्यालय सर्लाहीलाई पत्राचार गरेर अंगेशलाई बोलाइदिन आग्रह ग¥यो । त्यसको आधारमा प्रहरी चौकी हरिपुर्वाले अंगेशलाई पत्र थमाएर काठमाडौं जान भनेको छ ।
‘आज बिहान प्रहरीबाट शव बुझ्न आउन भनिएको छ,’ अंगेशले भने, ‘तर मसँग काठमाडौं जाने भाडा पनि छैन । अस्पतालको लाखौं रुपैयाँ उपचार खर्च तिर्नुपर्ने छ, शव कसरी ल्याउने ?’
उनले सबै पक्षसँग आर्थिक सहयोगको अपिल गरेका छन् ।
पविताको पित्त थैलीको शल्यक्रिया गत माघ ३ गते जनकपुरधाम–१४ पिडारीचोकस्थित दर्ता नभएको मुस्कान अस्पतालमा गरिएको थियो । उनका बुवा ब्रह्मदेव यादवका अनुसार सूर्या अल्ट्रासाउण्डका सञ्चालक सुशील यादवले बाध्य बनाएर त्यहा पठाएर शल्यक्रिया गराइएको थियो ।
सरकारी सेवा गरेका हेल्थ असिस्टेन्ट कमल राइनले सल्लाहकार र श्रीमतीलाई सञ्चालक बनाएर कुनै स्वीकृति नलिई खोलिएको अस्पतालमा सर्जन डा. ज्ञानकुमार साहले शल्यक्रिया गरेका थिए ।
शल्यक्रियापछि तीन दिनसम्म पविता बेहोस रहिन् । डाक्टरले स्नायु सम्बन्धी समस्या भन्दै सिटी स्क्यान गर्न सल्लाह दिए । सिटी स्क्यानपछि सम्बन्धित विशेषज्ञ नहुँदा उनलाई माघ ६ गते जानकी हेल्थकेयर लगियो र पछि माघ २९ गते काठमाडौंको केएमसी अस्पतालमा भर्ना गरिएको थियो । त्यसयतापनि उनको होस आएको थिएन ।