डेटूडे खबर डेस्क
  २५ कार्तिक २०८२

                            
एजेन्सी
भारतको राजधानी नयाँ दिल्लीमा रहेको ऐतिहासिक लालकिला नजिकै सोमबार साँझ भएको भीषण विस्फोटमा कम्तीमा ८ जनाको मृत्यु र १५ जना घाइते भएका छन्। विस्फोट सुभाष मार्गस्थित ट्राफिक सिग्नलमा पार्क गरिएको हुण्डाई आइ २० कारमा भएको पुष्टि भएको छ।
दिल्ली प्रहरीले घटनापछि यूएपीए धारा १६ र १८, विस्फोटक पदार्थ ऐन, र भारतीय न्याय संहिताका विभिन्न धाराहरू अन्तर्गत मुद्दा दर्ता गरेको छ। घटनाको अनुसन्धान एफएसएल, एनआईए र दिल्ली क्राइम ब्रान्च संयुक्त रूपमा गरिरहेका छन्।
दिल्ली प्रहरी आयुक्त सतीश गोल्चाले पत्रकारहरूसँग भने, “साँझ करिब ६ बजेर ५२ मिनेटमा रातो बत्तीमा रोकिएको कारमा विस्फोट भयो। आसपासका सवारीसाधन क्षतिग्रस्त भएका छन्। घटनास्थलमा विशेषज्ञ टोली अनुसन्धानमा खटिएका छन्।”
घाइतेहरूलाई एलएनजेपी अस्पताल भर्ना गरिएको छ। अस्पतालका अधिकारीका अनुसार आठ जनाको मृत्यु भइसकेको छ भने तीन जना गम्भीर अवस्थामा छन्।
गृहमन्त्री अमित शाहले घटनाबारे जानकारी दिँदै भने, “सुरक्षा निकायका सबै संयन्त्र सक्रिय छन्। घटनास्थलमा दस मिनेटभित्रै क्राइम ब्रान्च र स्पेशल ब्रान्चका टोली पुगेका थिए। अनुसन्धान हरेक कोणबाट भइरहेको छ।”
प्रधानमन्त्री नरेन्द्र मोदीले पनि विस्फोटबारे जानकारी लिँदै गृहमन्त्रीसँग सम्पर्क गरेका छन्। उनले घाइतेहरूको उपचारमा कुनै कमी हुन नदिन निर्देशन दिएका छन्।
विस्फोटपछि दिल्लीसहित मुम्बई, लखनउ, चण्डीगढ र जयपुरजस्ता प्रमुख सहरहरूमा सुरक्षा व्यवस्था कडा पारिएको छ। प्रशासनले नागरिकहरूलाई अफवाहमा नफस्न र सतर्क रहन आग्रह गरेको छ।