| 
सप्तरी । सप्तरीको बोदेबरसाइन नगरपालिका–१ धनगढीमा एक युवकले आफ्नै भाउजूको पेट्रोल छर्केर आगो लगाई हत्या गरेका छन् ।
सत्ताइस वर्षीया राजकुमारी साहको उपचारका क्रममा मृत्यु भएको प्रहरीले बताएको छ । दुई दिनअघि २० वर्षीय परमेश्वर साहले घरमै रोटी पकाइरहेकी आफ्नी भाउजू राजकुमारीको शरीरमा पेट्रोल छर्केर आगो लगाएको पीडित परिवारले आरोप लगाएको छ ।
जलेर गम्भीर घाइते भएकी राजकुमारीको उपचारका लागि विराटनगरस्थित अस्पतालमा भर्ना गरिएको थियो । उपचारका क्रममा उनको मृत्यु भएको हो ।
राजकुमारीका ३० वर्षीय पति रविनकुमारले आफू काम विशेषले घर बाहिर रहेको समयमा आफ्नै भाइले पत्नीको शरीरमा आगो लगाएको भन्दै प्रहरीमा उजुरी दिएका छन् ।
यता प्रहरी नायब उपरीक्षक माधवप्रसाद काफ्लेले भाउजूमाथि पेट्रोल छर्केर आगो लगाउने देवरको खोजी भइरहेको बताए ।
