डेटूडे खबर डेस्क
  ०६ माघ २०८०

                            
काठमाडाैँ । प्रधानमन्त्री कप १ दिवसीय राष्ट्रिय क्रिकेट प्रतियोगिता अन्तर्गत शनिबारको खेलमा कर्णाली प्रदेशलाई हराउँदै मधेश प्रदेशले जित हासील गरेका छन् ।
कीर्तिपुरस्थित त्रिवि मैदानमा आज भएको खेलमा मधेशले कर्णाली प्रदेशलाई ६१ रनले हराएको छ ।
जीतका लागि २३२ रनको लक्ष्य पछ्याएको कर्णाली ४१.१ ओभरमा अलआउट हुँदै १७० रनमा समेटिएको थियो ।
कर्णालीका लागि अर्जुन घर्तीले सर्वाधिक ५८ रन, दिनेश अधिकारीले ३३ र विपिन शाहीले ३१ बनाए ।
बलिङमा मधेशका लागि राजेश यादव र प्रदीप पासवानले २/२ विकेट लिए । रुपेश सिंह, अभिषेक तिवारी, रंजित कुमार, हरिशंकर शाह र पवन सर्राफले १/१ विकेट लिएका थिए ।
पहिले ब्याटिङ गरेको मधेशले निर्धारित ५० ओभरमा ९ विकेटको क्षतिमा २३१ रन बनाएको थियो । मधेशको जीतमा कप्तान हरिशंकर शाह र मयन यादवले अर्धशतकीय इनिङ खेले । हरिशंकर र मयनले समान ५०/५० रन बनाए ।
खेलमा अनिल शाहले ४४, अविशेक तिवारीले ३४, राजेश यादव र प्रदिप पासवानले ११/११ रन बनाए । बलिङमा दीपेन्द्र रावतले ४ विकेट, अनुज चनाराले २ तथा दिनेश अधिकारी, युनिस सिंह र दिवान पुनले १/१ विकेट लिए ।
जीतसँगै मधेशले ६ अंक बनाएको छ भने कर्णालीको ४ अंक छ । प्रतियोगितामा सुदूरपश्चिम र बागमतीले पनि समान ६ अंक बनाएका छन् ।